बेलगाम प्राईड/ मूळचे लोंढा येथील आणि सध्या बेळगावच्या टिळकवाडी परिसरात वास्तव्यास असलेले जेष्ठ पत्रकार प्रकाश श्रीपाद परुळेकर (वय ६७) यांचे सोमवारी दुःखद निधन झाले आहे. त्यांच्या पश्चात त्यांची पत्नी विवाहित कन्या जावई दोन विवाहित बहिणी भाऊजी असा परिवार आहे. बेळगावच्या मराठी पत्रकारितेत अभ्यासू वृत्तीला महत्त्व देत त्यांनी आपला एक वेगळा ठसा उमटवला होता.
पत्रकारितेची खास शैली आणि मार्गदर्शक: नीटनेटकेपणा आणि रुबाब हे त्यांचे विशेष गुण उठून दिसायचे. ‘प्रकाशझोत’ ही त्यांची मालिका त्यांच्या शोध पत्रकारितेच्या वैशिष्ट्यांचे दर्शन घडवून जायची. खानापूर तालुका आणि बेळगाव जिल्ह्याचा त्यांचा अभ्यास प्रचंड होता, ज्यामुळे त्यांच्या बातम्या सखोल असत. त्यांनी अनेक पत्रकार घडवले आणि त्यांना योग्य मार्गदर्शन केले.
दीर्घ आणि महत्त्वपूर्ण कारकीर्द: परुळेकर यांनी ‘तरुण भारत’ मधून आपल्या पत्रकारितेच्या प्रवासाची सुरुवात केली. त्यानंतर त्यांनी काही काळ ‘इन बेळगाव’चे संपादक म्हणून काम पाहिले. पुन्हा ‘तरुण भारत’चे मुख्य प्रतिनिधी आणि आवृत्ती प्रमुख, ‘पुण्यनगरी’चे आवृत्ती प्रमुख आणि ‘पुढारी’ वृत्तपत्राचे निवासी संपादक असा मोठा आणि महत्त्वाचा प्रवास त्यांनी केला.
पीव्हीजी ग्रुपमधील योगदान: पीव्हीजी ग्रुपमध्ये काम करताना त्यांनी पीव्हीजी ट्रान्सलाईन्सचे प्रमुख म्हणून जबाबदारी निभावली होती. त्यांच्या कामाची पद्धत नेहमीच शिस्तबद्ध आणि उच्च दर्जाची राहिली.
निवृत्तीनंतरही सक्रियता: सध्या ते निवृत्त जीवन जगत होते, तरीही ते व्हॉट्सॲपच्या माध्यमातून ‘Knowledge’ नावाची छायाचित्रांची एक सिरीज आपल्या जवळच्या लोकांना नियमितपणे पाठवत असत. त्यांच्या अचानक जाण्याने बेळगावच्या पत्रकारिता क्षेत्राला एक मोठा धक्का बसला असून, एका समर्पित आणि अभ्यासू पत्रकाराच्या युगाचा अंत झाल्याची भावना व्यक्त होत आहे. यांची अंत्यविधी उद्या मंगळवारी सकाळी 10- 00 वाजता शहापूर स्मशानभूमी येथे होणार आहे.
