बेलगाम प्राईड/ माझ्या आईने मला शारीरिक जन्म दिला असला तरी माझ्या राजकीय आयुष्याला जन्म देणारे बेळगाव ग्रामीण मतदारसंघातील जनताच आहेत असे महिला व बालविकास मंत्री लक्ष्मी हेब्बाळकर यांनी सांगितले.
आपल्या वाढदिवसानिमित्त बेनकनहळ्ळीत आयोजित भव्य कार्यक्रमात बोलताना त्यांनी मतदारसंघातील जनतेने दिलेल्या पाठिंब्यामुळेच राज्यात मंत्री होण्याची संधी मिळाली अशी कृतज्ञता व्यक्त केली. जनतेची घरातील मुलगी म्हणून प्रामाणिकपणे सेवा करत असल्याचे त्यांनी सांगितले.
ज्येष्ठ नागरिक व गुरुजनांचे मार्गदर्शन हेच आपल्या जीवनाचे आधार असल्याचे सांगून आई-वडिलांचा सन्मान हा भारतीय संस्कृतीचा मूलभूत मूल्य आहे. असे त्या म्हणाल्या. ज्येष्ठ नागरिकांसाठीच्या शासकीय योजना घरपोच पोहोचविण्याचा प्रयत्न सुरूच राहील अशी त्यांनी ग्वाही दिली. गृहलक्ष्मी योजनेमुळे महिलांना कुटुंबातील आर्थिक निर्णयांमध्ये बळ मिळाले आहे. असेही त्यांनी नमूद केले.
ज्येष्ठ नागरिक म्हणजे फक्त वयोवृद्ध नव्हेत, तर समाजाच्या अनुभवाचे जिवंत ग्रंथ आहेत असे वर्णन करून त्यांनी आपला वाढदिवस वैयक्तिक उत्सव म्हणून नव्हे तर ज्येष्ठांच्या सेवेला समर्पित करणेच आपल्याला आनंद देते असे सांगितले. ज्येष्ठांचा सन्मान करणारे समाजच खऱ्या अर्थाने विकसित समाज असतात. आज आपण तंत्रज्ञानात पुढे जात आहोत, पण मूल्यांमध्ये मागे जाता कामा नये. त्या मूल्यांचे जिवंत रूप म्हणजे ज्येष्ठ नागरिक. मी जनप्रतिनिधी आणि मंत्री म्हणून जे काही साध्य केले, त्यामागे ज्येष्ठांचे मार्गदर्शन, आशीर्वाद आणि संस्कार आहेत, असे त्यांनी सांगितले.
ज्येष्ठ नागरिक म्हणजे केवळ वयोवृद्ध नव्हेत; तुम्ही आमच्या समाजाच्या अनुभवाची पुस्तके आहात. तुम्ही चालत आलेला मार्गच आम्हाला दिशा दाखवणारा नकाशा आहे. तुम्ही भोगलेल्या अडचणी आमच्यासाठी मजबूत धडे आहेत. आपण उभे असलेली ही भूमी मजबूत करणारे तुम्हीच आहात. आपण आज उपभोगत असलेले स्वातंत्र्य, सुविधा आणि संधी यांच्या मागे तुमचे त्याग आहेत. म्हणूनच माझा वाढदिवस वैयक्तिक आनंद म्हणून नव्हे तर ज्येष्ठांच्या सेवेद्वारे अर्थपूर्णरीत्या साजरा करण्याचा निर्णय घेतला आहे, असे मंत्री हेब्बाळकर म्हणाल्या.
इतिहासात नोंद होणारा दिवस : चन्नराज हट्टीहोळी
एखाद्या मंत्र्याने आपल्या कार्यकाळात ज्येष्ठ नागरिकांसोबत वाढदिवस साजरा करणे ही दुर्मिळ घटना आहे, असे विधान परिषद सदस्य चन्नराज हट्टीहोळी यांनी सांगितले. ज्येष्ठ, युवक अशा सर्वांना विश्वासात घेऊन काम करणाऱ्या लक्ष्मी हेब्बाळकर या सार्थक नेतृत्व दाखवत आहेत. कर्नाटक सरकारमध्ये मंत्री म्हणून गृहलक्ष्मी योजना राबवून त्यांनी देशासमोर आदर्श निर्माण केला आहे. असे ते म्हणाले.
समाजासाठी आदर्श नेत्या : गुरुसिद्ध स्वामीजी
सामान्य जनतेच्या अडचणींना प्रतिसाद देण्याची वृत्तीच लक्ष्मी हेब्बाळकर यांना लोकप्रियता मिळवून देत आहे. असे कारंजी मठाचे गुरुसिद्ध स्वामीजी यांनी सांगितले. सर्वसामान्यांसाठी कार्य करून त्या सर्वांसाठी आदर्श ठरल्या आहेत. इतकी लोकप्रियता मिळवणारे मंत्री, आमदार क्वचितच आढळतात, असे त्यांनी गौरवोद्गार काढले.ज्येष्ठांचा सन्मान करून मंत्र्यांनी समाजासमोर आदर्श ठेवला आहे. कोणीही चांगले कार्य करत असताना त्यांना पाठिंबा देणे हे आपले कर्तव्य आहे.
शतायुषींचा सत्कार
वाढदिवसानिमित्त ८ शतायुषींचा मंचावर सत्कार करण्यात आला. कार्यक्रमापूर्वी ज्येष्ठ नागरिकांसाठी क्रीडा स्पर्धांचे आयोजन करण्यात आले होते. बेळगाव जिल्ह्याच्या विविध भागांतून हजारो नागरिकांनी उपस्थित राहून कार्यक्रमाला उत्स्फूर्त प्रतिसाद दिला.यावेळी विविध मान्यवर, पदाधिकारी व कार्यकर्ते उपस्थित होते.
भव्य कार्यक्रम
बेनकनहळ्ळी येथील गार्डन कोर्ट हॉटेलसमोरील विशाल मैदानात कार्यक्रम भव्य स्वरूपात पार पडला. सुमारे १५ हजारांहून अधिक लोकांनी उपस्थित राहून बसल्या जागी हात वर करून मंत्री लक्ष्मी हेब्बाळकर यांना आशीर्वाद दिला. ज्येष्ठांसाठी असा दुर्मिळ कार्यक्रम आयोजित केल्याबद्दल उपस्थितांनी मंत्र्यांचे मुक्तकंठाने कौतुक केले.
