जागतिक स्केटिंग स्पर्धेसाठी निवड झालेल्या साईराज मेंडके यांचे बेळगावात स्वागत
बेलगाम प्राईड/ दक्षिण अमेरिकेतील पॅराग्वे येथे झालेल्या जागतिक स्केटिंग स्पर्धेसाठी भारतीय संघात निवड झालेल्या बेळगाव जिल्हा रोलर स्केटिंग असोसिएशनचे स्केटर साईराज मेंडके यांचे बेळगाव विमानतळावर आगमन होताच उत्साहात स्वागत करण्यात आले.
साईराज यांची चंदीगड येथे झालेल्या निवड चाचणीतून भारतीय स्केटिंग संघासाठी निवड झाली होती. गेल्या १२ वर्षांपासून ते स्केटिंगचे प्रशिक्षण घेत असून, जागतिक स्पर्धेत सहभागी होण्यासाठी त्यांनी रात्रंदिवस मेहनत घेतली. अल्पाइन स्पीड स्लालम प्रकारात त्यांनी सहभाग घेतला.
जागतिक स्पर्धेत साईराज यांनी दहावे स्थान मिळवले. आंतरराष्ट्रीय स्तरावर भारताचे प्रतिनिधित्व करून त्यांनी बेळगावच्या क्रीडा क्षेत्राची ओळख जागतिक पातळीवर पोहोचवली आहे.
बेळगाव विमानतळावर प्रशिक्षक सूर्यकांत हिंडलगेकर यांच्या हस्ते पुष्पहार घालून साईराज यांचे स्वागत करण्यात आले. यावेळी मंजुनाथ मंडोळकर, श्रीकांत मेंडके, अर्चना मेंडके, विनोद बामणे, ज्योती बामणे, नैना शिवराज, शिवराज, लीना कोरीशेट्टी, संगीता अंकले, चौकसिंग पुरोहित, यशपाल पुरोहित, प्रशांत कांबळे, भक्ती हिंडलगेकर यांच्यासह बेळगाव जिल्हा रोलर स्केटिंग असोसिएशनचे पालक आणि स्केटर्स उपस्थित होते.
साईराज यांच्या या यशाबद्दल क्रीडाप्रेमींकडून अभिनंदन होत असून, त्यांच्या पुढील क्रीडा वाटचालीसाठी शुभेच्छा व्यक्त केल्या जात आहेत.
