बेलगाम प्राईड/ मराठा लाईट इन्फंट्री रेजिमेंटल सेंटर येथे १३ जानेवारी २०२६ रोजी माजी सैनिक दिवस अत्यंत सन्मान, शिस्त तसेच भावनिक वातावरणात साजरा करण्यात आला. देशसेवेसाठी सर्वोच्च बलिदान देणाऱ्या शहीद जवानांना आदरांजली अर्पण करत रेजिमेंटने आपल्या समृद्ध परंपरेचा गौरव केला.
कार्यक्रमाची सुरुवात शरकत वॉर मेमोरियल येथे पुष्पचक्र अर्पण करून कार्यक्रमाची सुरुवात करण्यात आली. यावेळी मराठा रेजिमेंटच्या शौर्यगाथा आणि देशासाठी दिलेल्या बलिदानांची आठवण करून देण्यात आली. शिस्तबद्ध वातावरणात पार पडलेल्या या समारंभात माजी सैनिकांसह कार्यरत अधिकारी व जवान मोठ्या संख्येने सहभागी झाले होते.
हा कार्यक्रम ब्रिगेडियर जॉयदीप मुखर्जी, स्टेशन कमांडर व कमांडंट, मराठा यांच्या नेतृत्वाखाली आयोजित करण्यात आला. उपस्थित ज्येष्ठ माजी सैनिक मेजर जनरल मोहन कट्टी (निवृत्त) यांच्या नेतृत्वाखाली १५ माजी अधिकारी, ४५ जेसीओ आणि ४२ अन्य पदावरील माजी सैनिक सहभागी झाले होते. तसेच २० अधिकारी, १५ जेसीओ आणि १० अन्य पदावर कार्यरत जवानही या कार्यक्रमा प्रसंगी उपस्थित होते. यामुळे रेजिमेंटमधील माजी व वर्तमान पिढ्यांमधील अतूट नाते अधोरेखित झाले.
पुष्पचक्र अर्पण समारंभानंतर चहा व संवाद सत्राचे आयोजन करण्यात आले. या सत्रात माजी सैनिकांनी आपल्या सेवाकाळातील आठवणींना उजाळा दिला, तर तरुण जवानांना अनुभवांचे मार्गदर्शन लाभले. या बोधवाक्याची प्रचिती देणारा हा क्षण माजी सैनिकांप्रती रेजिमेंटचा आदर आणि कृतज्ञता व्यक्त करणारा ठरला.
माजी सैनिक दिवसाच्या निमित्ताने मराठा रेजिमेंटने आपल्या परंपरा, शौर्य आणि देशभक्तीची मूल्ये पुढील पिढीपर्यंत पोहोचवण्याचा संदेश दिला.
