पंच हमी योजनांमुळे महिला सक्षमीकरण : मंत्री लक्ष्मी हेब्बाळकर 

बेलगाम प्राईड बेंगळुरू/ महिलांना सशक्त करण्याचे काम आमचे सरकार प्रामाणिकपणे करत आहे. महिला स्वाभिमानाने जगावी या उद्देशाने गृहलक्ष्मी आणि शक्ती योजना राबविण्यात आल्या आहेत, असे महिला व बालविकास मंत्री लक्ष्मी हेब्बाळकर यांनी सांगितले.

बेंगळुरूतील लग्गेरे येथील बसवेश्वर भवन येथे काँग्रेस नेते लग्गेरे नारायणस्वामी यांच्या वाढदिवसानिमित्त 208 महिलांसाठी आयोजित सामूहिक सीमंत कार्यक्रम, मोफत आरोग्य तपासणी, रक्तदान शिबिर आणि शस्त्रक्रिया शिबिराचे उद्घाटन करताना त्या बोलत होत्या. महिला आज स्वतंत्रपणे निर्णय घेण्याइतकी सक्षम झाली आहे, असे त्यांनी नमूद केले.

समाजात उच्च स्थान मिळवणाऱ्या आणि निरोगी बाळाला जन्म देण्यासाठी शुभेच्छा देताना मंत्री म्हणाल्या की, आमच्या विभागामार्फत महिला गर्भवती झाल्यानंतर जन्मणाऱ्या बाळाची 6 वर्षांपर्यंतची जबाबदारी सरकार घेते. गर्भवती महिला आणि बालकांना पौष्टिक आहार दिला जात आहे.

नारायणस्वामी यांच्या कार्याचे कौतुक

सामाजिक उपक्रमांद्वारे गरीब आणि गरजू लोकांना नारायणस्वामी मदत करत आहेत. त्यांच्या कार्यातून मला प्रेरणा मिळाली आहे. राजकारणासाठी नव्हे तर सामाजिक बांधिलकीतून ते हे कार्यक्रम राबवत आहेत. अशा पुण्याच्या कामात गुंतलेल्या त्यांच्या कुटुंबाला चांगले घडो, असे त्यांनी म्हटले.मी दरवर्षी बेलगाव ग्रामीण मतदारसंघात सामूहिक सीमंत कार्यक्रम आयोजित करते, गेल्या 7 वर्षांपासून हे काम सुरू आहे, असेही त्यांनी सांगितले.

यावेळी चित्रदुर्ग येथील मडिवाळ माचिदेव गुरुपीठाचे जगद्गुरु श्री मडिवाळ माचिदेव स्वामीजी, काँग्रेस नेते कुसुमा हनुमंतरायप्पा, लग्गेरे नारायणस्वामी, मंजुळा नारायणस्वामी, अभिनेत्री आणि बिग बॉस स्पर्धक अश्विनी गौडा, आशा सुरेश, रूपा लिंगेश, मंजुळा मंजुनाथ बाबू यांच्यासह अनेक जण उपस्थित होते.