दि.१६ जुलै २०२६
बेलगाम प्राईड/ अलीकडे उघडकीस आलेल्या काही घटनांच्या पार्श्वभूमीवर, बेळगाव शहर पोलिसांनी शहरातील क्लब, जिमखाने तसेच इतर मनोरंजन केंद्रांच्या कामकाजाची सर्वंकष तपासणी करण्यासाठी विशेष मोहीम सुरू केली आहे.
शहरातील सर्व पोलीस ठाण्यांच्या पोलीस निरीक्षकांना त्यांच्या हद्दीतील सर्व क्लब आणि मनोरंजन केंद्रांची यादी तयार करून, ती कायदेशीर परवाना आणि आवश्यक परवानग्यांसह कार्यरत आहेत का याची पडताळणी करण्याचे निर्देश देण्यात आले आहेत.
कोणत्याही क्लब किंवा मनोरंजन केंद्रात पत्त्यांचे खेळ (Card Games) किंवा तत्सम उपक्रम सुरू असल्याचे आढळल्यास, कर्नाटक उच्च न्यायालयाने वेळोवेळी दिलेल्या निर्देशांनुसार तसेच लागू असलेल्या कायद्यांनुसार पाळावयाच्या अटी लेखी स्वरूपात संबंधित संस्थांना देण्यात येतील. तसेच, या सूचनांची प्राप्ती झाल्याची लेखी पावतीही संस्थेच्या जबाबदार पदाधिकाऱ्यांकडून घेण्यात येणार आहे.
मुख्य अटी पुढीलप्रमाणे आहेत:
1. प्रवेशद्वार आणि खेळाच्या ठिकाणी सीसीटीव्ही कॅमेरे अनिवार्यपणे बसविणे.
2. सीसीटीव्हीचे किमान १५ दिवसांचे चित्रीकरण सुरक्षित ठेवून, पोलिसांनी मागणी केल्यास उपलब्ध करून देणे.
3. सर्व सदस्यांना ओळखपत्र देणे.
4. सदस्य नसलेल्या व्यक्ती किंवा पाहुण्यांना खेळात सहभागी होण्यास परवानगी न देणे.
5. पैशांची पैज, बेटिंग, जुगार किंवा इतर कोणत्याही बेकायदेशीर खेळांना परवानगी न देणे.
6. पोलिसांच्या तपासणी व देखरेखीस पूर्ण सहकार्य करणे.
सर्व पोलीस ठाण्यांनी १० दिवसांच्या आत आपला तपासणी अहवाल पोलीस आयुक्त कार्यालयात सादर करायचा आहे. तपासणीदरम्यान कोणताही क्लब किंवा मनोरंजन केंद्र कायद्याचे किंवा घालून दिलेल्या अटींचे उल्लंघन करत असल्याचे आढळल्यास, संबंधित परवाना देणाऱ्या प्राधिकरणाकडे परवाना रद्द करण्याची शिफारस करण्यात येईल. तसेच, लागू कायद्यांनुसार संबंधितांविरुद्ध कायदेशीर कारवाई करण्यात येईल.
बेळगाव शहर पोलिसांचा उद्देश कायदेशीररीत्या चालणाऱ्या क्लब किंवा मनोरंजन केंद्रांना त्रास देणे नसून, बेकायदेशीर जुगार, बेटिंग, सार्वजनिक सुव्यवस्थेला बाधा आणणाऱ्या तसेच गुन्हेगारीला खतपाणी घालणाऱ्या कोणत्याही बेकायदेशीर कारवायांना आळा घालणे हा या विशेष मोहिमेचा मुख्य उद्देश असल्याचे स्पष्ट करण्यात आले आहे.
बेळगाव शहरातील सर्व क्लब, मनोरंजन केंद्रे तसेच नागरिकांनी या मोहिमेस सहकार्य करावे, असे आवाहन बेळगाव शहराचे पोलीस आयुक्त यांनी केले आहे.
