मराठा लाईट इन्फंट्री रेजिमेंटल सेंटरमध्ये २ व ३ नोव्हेंबरला डीएससी भरती मेळावा
माजी सैनिकांसाठी जनरल ड्युटी आणि लिपिक पदांसाठी भरती; पात्र उमेदवारांना सहभागी होण्याचे आवाहन
बेलगाम प्राईड/ येथील मराठा लाईट इन्फंट्री रेजिमेंटल सेंटरमध्ये येत्या २ आणि ३ नोव्हेंबर २०२६ रोजी डिफेन्स सिक्युरिटी कॉर्प्स (DSC) मध्ये भरती होण्यासाठी भरती मेळाव्याचे आयोजन करण्यात येणार आहे. या भरती मेळाव्यात नियमित लष्करातील माजी सैनिक तसेच मराठा लाईट इन्फंट्रीशी संबंधित टेरिटोरियल आर्मी (TA) मधील पात्र माजी सैनिकांना सहभागी होता येणार आहे.
या भरती मेळाव्याद्वारे सैनिक जनरल ड्युटी (Soldier General Duty) आणि सैनिक लिपिक (Soldier Clerk – SD) या पदांसाठी पुनर्नियुक्ती करण्यात येणार आहे. संबंधित पदांसाठी इच्छुक आणि पात्र उमेदवारांनी २ नोव्हेंबर २०२६ रोजी सकाळी ८ वाजता मराठा लाईट इन्फंट्री रेजिमेंटल सेंटर, बेळगाव येथे उपस्थित राहावे, असे आवाहन करण्यात आले आहे.
वयोमर्यादा आणि पुनर्नियुक्तीसाठी अटी
डीएससी भरतीसाठी सैनिक जनरल ड्युटी पदाच्या उमेदवारांची पूर्वीच्या सेवेतून निवृत्ती झाल्याच्या तारखेपासून दोन वर्षांच्या आत पुनर्नियुक्ती होणे आवश्यक आहे. तसेच, सैनिक लिपिक (SD) पदासाठी ही मुदत निवृत्तीच्या तारखेपासून पाच वर्षांच्या आत असणे आवश्यक आहे.
वयोमर्यादेनुसार, सैनिक जनरल ड्युटी पदासाठी उमेदवाराचे वय भरतीच्या दिवशी ४६ वर्षांपेक्षा कमी असावे. तर सैनिक लिपिक (SD) पदासाठी उमेदवाराचे वय भरतीच्या दिवशी ४८ वर्षांपेक्षा कमी असणे आवश्यक आहे.
पात्र माजी सैनिकांना आवाहन
डीएससीमध्ये सैनिक जनरल ड्युटी किंवा सैनिक लिपिक (SD) पदावर पुनर्नियुक्ती होण्यासाठी इच्छुक आणि वरील अटी पूर्ण करणाऱ्या पात्र उमेदवारांनी निर्धारित वेळेत भरती मेळाव्यास उपस्थित राहावे.
भरतीसंदर्भातील अधिक माहिती आणि आवश्यक तपशीलांसाठी इच्छुक उमेदवारांनी मराठा लाईट इन्फंट्री रेजिमेंटल सेंटर, बेळगाव येथे संपर्क साधावा, असे प्रसिद्धीपत्रकात नमूद करण्यात आले आहे.
