बेलगाम प्राईड/ भारताचे मुख्य निवडणूक आयुक्त ज्ञानेश कुमार यांच्यावर निवडणूक प्रक्रियेत हस्तक्षेप करून मतदारांची नावे मोठ्या प्रमाणात मतदार यादीतून वगळल्याचे आरोप करण्यात आले आहेत. या पार्श्वभूमीवर त्यांच्या राजीनाम्याची मागणी प्रोग्रेसिव्ह रायटर्स असोसिएशन, अंधश्रद्धा निर्मूलन समिती, जीवन विवेक प्रतिष्ठान आणि भारतीय कम्युनिस्ट पक्षाच्या वतीने करण्यात आली आहे. यासंदर्भात बेळगावचे जिल्हाधिकारी यांना निवेदन सादर करण्यात आले आहे.
निवेदनात म्हटले आहे की, गेल्या काही महिन्यांपासून मुख्य निवडणूक आयुक्त ज्ञानेश कुमार यांच्या कार्यपद्धतीवर प्रश्नचिन्ह उपस्थित केले जात आहे. विशेष सखोल मतदार यादी पुनरीक्षण (एसआयआर) प्रक्रियेच्या माध्यमातून मोठ्या संख्येने मतदारांची नावे वगळण्यात आल्याचा आरोप करण्यात आला आहे. या प्रक्रियेमुळे तब्बल १३ कोटींहून अधिक मतदारांची नावे मतदार यादीतून हटविण्यात आल्याचा दावा निवेदनात करण्यात आला आहे.
तसेच, भारतीय निवडणूक आयोगाच्या अंतर्गत कामकाजात मतभेद निर्माण झाल्याचेही निवेदनात नमूद करण्यात आले आहे. निवडणूक आयुक्त सुखबीर सिंह संधू आणि विवेक जोशी यांनी गेल्या दहा महिन्यांत मुख्य निवडणूक आयुक्तांच्या काही एकतर्फी निर्णयांवर किमान १४ वेळा आक्षेप घेतल्याचे वृत्त असल्याचा उल्लेख करण्यात आला आहे. फॉर्म-६ मध्ये करण्यात आलेल्या बदलांबाबतही प्रश्न उपस्थित करण्यात आल्याचे निवेदनात म्हटले आहे.
मुख्य निवडणूक आयुक्तांच्या कार्यपद्धतीमुळे भारतीय निवडणूक आयोगाची स्वायत्तता आणि कार्यक्षमतेवर परिणाम होत असल्याचा आरोपही संघटनांनी केला आहे. तसेच, सत्ताधारी भारतीय जनता पक्षाच्या फायद्यासाठी निवडणूक आयोगाचा वापर केला जात असल्याचा संशय व्यक्त करण्यात आला आहे.
या सर्व आरोपांची गांभीर्याने दखल घेऊन मुख्य निवडणूक आयुक्त ज्ञानेश कुमार यांनी तातडीने आपल्या पदाचा राजीनामा द्यावा, तसेच त्यांच्या कार्यपद्धतीची निष्पक्ष चौकशी करून वस्तुस्थिती जनतेसमोर आणावी, अशी मागणी निवेदनाद्वारे करण्यात आली आहे.
वरील आरोप आणि आकडेवारी निवेदनात करण्यात आलेल्या दाव्यांवर आधारित आहेत. त्यांची स्वतंत्रपणे पुष्टी झालेली असल्याचे येथे गृहीत धरलेले नाही.
