काकतीत कितूर उत्सव-२०२६ चा दिमाखदार शुभारंभ!

बेलगाम प्राईड/ स्वातंत्र्यलढ्यातील अद्वितीय शौर्य, त्याग आणि देशभक्तीचे प्रतीक असलेल्या राणी कित्तूर चन्नम्मा यांच्या जन्मभूमी काकती येथे २०२ व्या कित्तूर विजय महोत्सवानिमित्त आयोजित कित्तूर उत्सव-२०२६ चा दिमाखदार शुभारंभ करण्यात आला. या उद्घाटन समारंभाला बेळगाव उत्तरचे आमदार आसिफ (राजू) सैत आणि मंत्री सतीश जारकीहोळी यांची प्रमुख उपस्थिती होती.

ब्रिटिश सत्तेविरुद्ध धैर्याने लढा देणाऱ्या राणी कित्तूर चन्नम्मा या कर्नाटकातील अत्यंत आदरणीय स्वातंत्र्यसैनिकांपैकी एक आहेत. त्यांच्या पराक्रमाने, त्यागाने आणि देशभक्तीने अनेक पिढ्यांना प्रेरणा दिली आहे. त्यांच्या शौर्यपूर्ण कार्याचे स्मरण करून त्यांच्या योगदानाला अभिवादन करण्यासाठी दरवर्षी कित्तूर विजय महोत्सवाचे आयोजन केले जाते.

कित्तूर उत्सवात सांस्कृतिक कार्यक्रमांची मेजवानी

कित्तूर उत्सव-२०२६ अंतर्गत विविध सांस्कृतिक कार्यक्रम, स्वातंत्र्यसैनिकांना अभिवादन तसेच कर्नाटकच्या समृद्ध ऐतिहासिक वारशाचे आणि पारंपरिक संस्कृतीचे दर्शन घडविणारे विविध उपक्रम आयोजित करण्यात येणार आहेत. या उत्सवाच्या माध्यमातून राणी कित्तूर चन्नम्मा यांच्या पराक्रमाची गाथा नव्या पिढीपर्यंत पोहोचविण्यासह राज्याच्या सांस्कृतिक परंपरांचे जतन आणि संवर्धन करण्याचा प्रयत्न केला जात आहे.

या उद्घाटन समारंभाला बेळगावचे पोलीस आयुक्त प्रकाश निकम, जिल्हा पंचायतचे मुख्य कार्यकारी अधिकारी राहुल शिंदे, विविध समाजांचे ज्येष्ठ नेते तसेच अनेक मान्यवर उपस्थित होते.राणी कित्तूर चन्नम्मा यांच्या शौर्याचा आणि स्वातंत्र्यलढ्यातील योगदानाचा गौरव करणाऱ्या या उत्सवामुळे काकती आणि कित्तूर परिसरात ऐतिहासिक वारशाबद्दल अभिमानाची भावना अधिक दृढ होत आहे.