बेलगाम प्राईड/ मुलांमध्ये अभ्यासासोबतच राष्ट्रप्रेमही विकसित झाले, तर असे शिक्षण खऱ्या अर्थाने सार्थक ठरते. संत मीरा शाळेच्या शिक्षणपद्धतीत भारतीयत्व, संस्कृती आणि कलेचे दर्शन घडते, असे शालेय शिक्षण विभागाच्या उपसंचालिका लीलावती हिरेमठ यांनी सांगितले.
आनगोळ येथील जनकल्याण ट्रस्टच्या संत मीरा इंग्लिश मीडियम शाळेच्या वार्षिक स्नेहसंमेलन कार्यक्रमात प्रमुख पाहुण्या म्हणून सहभागी होऊन त्या बोलत होत्या. शिक्षण संस्था केवळ अभ्यासापुरतेच मुलांना मर्यादित न ठेवता त्यांच्या सर्वांगीण विकासाकडे लक्ष द्यावे. त्या दिशेने संत मीरा शाळा उत्तम कार्य करत आहे. शिक्षणाकडे व्यवसाय म्हणून पाहिले जात नाही. विभागासोबतही शाळेचा उत्तम समन्वय आहे. शाळेबाबत कधीही तक्रारी आलेल्या नाहीत, असे त्यांनी नमूद केले.
उद्योगपती श्रीधर उप्पिन यांनी सांगितले की, देशाचे भविष्य मुलांमध्ये दडलेले आहे. त्यामुळे उत्तम शिक्षणासह त्यांचे संगोपन केले, तर राष्ट्राचे भविष्यही उज्ज्वल होते. असे कार्य संत मीरा शाळा करत आहे.
शाळेचे अध्यक्ष परमेश्वर हेगडे यांनी स्वागत केले. उपमहापौर वाणी जोशी यांनी कार्यक्रमाचे उद्घाटन केले. मुख्याध्यापिका सुजाता दप्तारदार यांनी अहवाल वाचन केले. विद्यार्थ्यांनी नृत्य, गीतगायन, नाटक तसेच देशभक्तीपर गीते सादर केली.
कार्यक्रमाला व्यवस्थापन मंडळाचे सदस्य, शाळेचे व्यवस्थापन अधिकारी आर. के. कुलकर्णी, सहमुख्याध्यापिका ऋतुजा जाधव, शाळेतील शिक्षक व कर्मचारी उपस्थित होते.
